Tripura Society's Website, Independant, and Aunthentic Information & Views About Tripura

TripuraSociety.org

            Home

Travel

Edunews

Student Cell

Jobnews

Who's Who

ADC

About Us

 

Location
History
Geography
ADC
Customs
Language
Community
Religion

Sports
Edunews
Jobnews
Khorang-05
Khorang-06

Photogallary
Culture

Student Cell
Tripuri Cuisines
 
Folk Medicine
Travel
Who's Who

About Us
Terms of Use
Your Comment
List of  Donors
Our Travel Partners in Thailand


 

           

Khorang Magazine 2006

Poetry

Article

Imangni Hathai

Sochindro Ruwaja Parani Ringma

Kokborok

Chethuwang

Sisabaidi

 

 Lamani Bwsa

Aichuk ni Boyar 

English

Langma ni Pohor 

Pohor Fasing

 

Muitu Mano

Bwmani Wansukma 

 

 

 

Imangni Hathai

Ashit Debbarma

 Yarwng dengduljak

Bwthai ni chwlwi wngmabai

Bachawi manlia

 kaham khe rotomwi.

Muchungma ni no

Bui hai dongo kwswngwi.

Salni pohorni monogwi.

Naithok khe thahngwi tongnani,

Fia jora kasuk lia,

Ahai khe tonnani.

Muchung jakya thwngbo

Naithok jakya thungbo

Budugo kwswngwi

Wachengo malwi.

Bwlai khwnagwi tonnai.

Khakama kupulung

Dongni sakmango kasawi.

Phaparno nasik nasigwi

Sakni hama ranyasak

Wansukmung rangchak,

Khapango khebwi

Imang ni haathaio

Beraiwi beraiwi

haping kwtalni

maitangno kholwi

khapang langao chap chabwi.

  

Salni logi logi

 Ashit Debbarma

Sal khegwi thahngkha hinwi

Satung kumun kwmai thahngo

Bini logi logi.

Khwrangjak bufang wafangrok

Somsawi thangrwrwgo

Chumui kosom no swlwi.

Khapang sak kobonjak

Boyarbai doljagwi

Rwktharwi thahngo

Salni logi logi.

Swlapna naio ang

langma kolok ni hadugo

thangsong lamani kwcharo.

Khwsaya fano kebo

ano bamsafano kebo.

Sak ferwi thahgbai fano

Salkhegwi thahng fano..

 

Langmani Nokhai

Ashit Debbarma

Thinang ni wansukmung no khawo chobwi,

Langma ni yapiri sete sete lengsuk kha,

Lamduk kolokno naharwi

Khorok lusaui twi lukhlairibo

Swrangwi faigwlak kha.

Agini mwkhangtwi agini mwchangtwi

Khasobom kuwakjak

Twimani twi kochoktwi

Hasingsano ban thesaui.

Mwthakna naimani

Baisaui se kochok sio taibo

Kwpal cholong ni gupatwi.

Khebai rio

Lanlgma kosoom pisarjak

Satung suwaio twi khoroi

Chandukma bahai kosorjak sapulwi

Talni gongiri pirjakno thumwi

Pohor kheregwi tubunani

Sajra kesebjak nokhwlawo

Langmani nwhai wate wate

Sal khek kha waruk pai baikha,

Tobo swnamwi manlia

Langma ni nokhai no buini yakni naithothok

Nokhor singo khachiui

Mwchangri tontwi

Manlia ang.

Kubuini Puitu

Lakkhidhon Murasingh

Sal habwi thahngtwtwi horni mwnankno puitu  chawo

Mwnagono athukuri mwchangsao bwlw,

Borog lama funugo.

Sauimano aichuk swkango aitorma tongo

Nokhawo athukuri chwngsaba sal kwrwide tong.

Thapa kwbaini hangar mihimjak

mwkhango tal kotorma mwchangsawo

Hor soi soi kosomlia,

Rumuduruduru buljak.

Athukurirokno kosolkhe ereng puitu rwnaya bwle.

Tabuk jotonu thubaikha siring soroop siring sorop

Nokhawo chumui kobono sinali bwrwino kosolo

Ayang bwkhawo thwi kwlalio thop thop….

Paisukjakya langma ni samung

Naharwgo lok lok…

Thinang achai songni mwkhang.

Siyari bising ni watwi thai kotor

Kwchangma borthor ahcairwui

saboba kok golok golok.

 Plastik ni khumsaka scent sarjak

Nasigwi siniya kubui

Khochui nugo

Chaswmai thwngkwrwng ni rwbai

Imangni nokse kwbai.

Fiyaba,

Nokhlawo khum kwlaiio yakung kobolw

Bufango bwkhwrwi chaksasa.

Kokborok kokthai ni bagwi

Sitwi siyatwi

Hiimfio kwlaitwtwi

Salni chwngsama naharwi.  

 

HOSTEL

 John Debbarma   

Hostel! tongo aro kaisa bell

Wngna puilao baksani bagwi bo kaisa hell.

 Tongo aro porinai chwrairok

Wngnai borokno hani borok.

Matongo aro buma-bufabai kagwi

Kunuphuruba kabna muchungwi.

Rwijakgo hostelo baksaba belai chwraiphuru

Wngnai borok swtwi bai khee kupuru.

Baksa torjawo khasiwo hostelo tongwino

Pogwi mangwlak borok hostelni tongmungrokno.

Tonglaio hostelo chwrai okwra mililai

Wnglaio kunuphuru belai walaina kwlai.

Malaio hostelo kwbangma borokrokbai

Ringlaio keboba kebono mwnai,ata,tei bai.

Hostelo siniwo siniya borokno

Rwnggo rwngya samungrokno.

Hostelo bwswkse soitan miriklai

Warden baibo bujakna kwlai.

Chalaijao mai-mui thokya phano

Bwkha hwno aphuru  "ma babu ba buphuru phaisino"?

Matongo hostelo jora tei wardenni kok khwnai

Hwnlaiwo aphuru o jala ba buphuru paisinai?

Porina phuru porilaijawo

Thwngna phuru chirikhogwi thwnglaiwo.

Kwrwi aphuru kunu poja wanama

Saimanlaya dukhurok manma.

Hostelo tongphuruba khatango nokhno

Chutio nokho tong phuru ma hwno"hostelo ba buphuru sogwisino"?

Hostelni tongthokrok tongthokbaya

Hostelni kokrokno bo sabaya.

Salaikhe bukhuko phaio mwnwima

Mokolo wngo muktwi kwbangma.

Tabukbo tongjawo ang hostelono

Pogwi mangwlak ang hostelni tongmungrokno,

ulo bura rawui phano.

                                                                                                                                                                                                                                          Go to Top

Chethuang

 Narendra Debbarma

             Chethuwang sawo…

             Angle tongjama saisung koinene.

             Bolong kuthug dungur besero.

             Hanok bai bwta no kaina hinmano.

             Hanok khwnawi wanajakmano.

             Fola hai birwi faiwi safaikha.

             Ta wanadi o abhagini bwrwi.

             Chethuwang naidi nwngle thangsidi.

             Thalik batasa nahar khulumdi.

             Kamini borok bol thumna thahngo.

             Logi rwtharwi bole thahngtero.

             Logibo bole kebono tonya.

             Buini logi bo bole rutharya.

             Bolong kuthugo saisung no habo.

             Chethuwang bwsa bole naithugo.

             Bolong kuthugo bole mantikha.

             Fuichai tubukha nog ari kaikha.

             Thalik batasa tubui khullum kha.

             Kubuino chethuwang torsai faikha.

             Hanok ni wanama khani helengkha.

             Taibo torsadi chethuwang hinkha.

             Wathobo khulumna jora sokfaikha.

             Ri kwtal chumwi hanok ongkhor kha.

             Bini gothokma chethuang no sakha.

             Chethuwang khwnai dukhu nangjak kha.

             Chethuwang sakha bole kasa kha.

             Kokthai kholsaui bole satikha.

             Dida bai ano kainani hino lok chethuwang lok.

             Chethuwang kubui tisai twlang kha.

              Kuchug sakawo bole thahngtikha.

              Buma bufa song khorang khwnakha.

             Chethuwang tanna ruwa tubukha.

              Fungsa tanthani fungba robogo.

             Chethuwang tannai rok lenglai sugo.

       Buma kabsawo bufale mogo.

       Bwta khai chethuwang no kwbago.

       Hanok le thahngkha nokhawo birsai.

       Chethuwang kwbagwi bwtale thwisai.

       Chethuwang tongsak bongni kok tongnai.

       Ha sakawo pirjagwi tongnai.

       Bwta bai hanok no bole swkagwi

       Buma ni swrai mung thahnglia kwmai.

       Bosokle thahngkha chethuwang ni kwmai.

 

                     Kok Surhorma

                                               Narendra Debbarma

       Falgun bo thahngtwi thahngtwi

       Chooitor bo faitwi faitwi.

       Bisi paithago kok surhorma

       Kokbo chortwi chortwi.

       Halok bo baitwi baitwi.

       Dangbai bo bortwi bortwi.

       Bwrwi ni bufa nog kuna thahngma

       Botol se khebtwi khebtwi.

       Bwrwi ni tongmung ba bobtwi

       Buini kok no da khatwi

       Raiba sama khe belaise naithok

       Khangar thwih patwi patwi.

       Khonjon toksa hai yapiri sehwi.

       Khwnai ha nangtwi nangtwi

       Afuru nwng bai daksa malaikha

       Nwngle kok satwi satwi.

Muitu Mano

 Rasiram Debbarma

 Kwchwngma sal habwi sanja gerepsawo,

Siring sorok mwnakjak horo

chengkhuru nobar bai kobonwi tongo.

nokha athukuri chamari thahngo riri khwlai

bini ari bwswk joratwi?

Boro thahng boro sogwi kebo siya!

Chwngbo langma tongsakno nini ani,

Langma pai thahngkhe boro sogwi boro thak kebo siya!

Baksa joriui kwraijak khumbar hai

Kwrai thahngo khochaui motom sunai kwrwi

Bini bahai no manna muchung nai kwrwi.

Mukumu kwmai thahngo.

 Baksa ba mokol baithangni imang sapulwi

Imang no mukthang khwlaio.

Rangchak ni aikhor bai mung swilango.

Bongni langma kwmaibo bumung kkomoorya

Imanag se mukthang ni boyar sibo.

 Bohrok chini langma bai tabuk kubulwi tongo.

Kha kwrak fan kwrak,

Imang no mukthang khwlai

Naithok ha kotor no yakar kwlango,

Nini ani jotoni bagwi.

 Tabuk bo chwng joto bohrok no muitu mano,

Boongni kothoma o ha sal tongsak

Kochogwi tongnai chini o hawo.

  

1945 Bisi

                                       Rasiram Debbarma

Chini achaima ha naithokma naidi,

Jorano mwchangwi toksa tokmili ni khorang bai

Bwswkse khwnathok naidi.

Fiyaba jora kaisao chini hawole

Chumui kosom kobolwi salo mukjag manya hai

Mwnagjak chini hapar.

 Afuru sikla chalai kaisa,

Mwnak no pohor khwlai nani,

Homchang mwswngwi lam kwtal funuknani swmai tangkha

O lan kwtalni mung narwkkha jono sikkha somiti

Borok imang nugkha rangchak Tripura ha chwngsama,

Tai kwchwng pohor bai mwchangsa mani.

Musubma kwrwi alama kwrwi

O jora bwswkse tongthokmani

Haifano langmale mwnakjak jotoni.

O jora langmani pohor tubuna bagwi

Sudhanwa-Dasarath-Hemanta tai logisong khorang tisakha

Jotoni bagwi rwng jotoni bagwino rwng

Bongni o khorang Durga choudhurini simi

Aguli tai hachwk beser beser sogwi kha.

Afuru bachwi kotor garing tongtwtwi swhngo

Chwngbo de langmawo pohor mwswngwi man?

Lama kwtal funuk nairok khorang yachagwi sawo

Au- oro chwrai okra jotono manu

Jotoni bagwino lam fiyokjak tongu.

Fia bugra Birbikram afuru hatai kotorma ongwi bachao,

Haifano jotono kha baksa fan baksakhe

Dagarma bai abo kwmai thahngo.

Bwskango tabuk swngmung faio,

Boongni o khorang jotode khwnabaikha?

Jotode langmani pohor mankha?

Bongni imangba imangbai mangde kubulwi tongsinai?

Bufuru wngwsinai mukthahng?

Tabuk tai khorok pugwi chapmanya hinwi

Kwmangwi tongnai joralia

Homchang kwrwi hachwk besero

Hor sowi kwtal homchang mwswngna nangnai

Mwnago lam kwtal ni pohor

Pirsaui rwna nangnai

Haikheno 1945 bisini 27 December

Swmai tanglai kubui tai mukthang wngnai.

 

                                                                                                         Go to Top

 

 Lamani Bwsa

        Sunil Debbarma

       Khapang swlwgwi mokolni muktwi

       Twimukno solwi yorkhwlai jak muktwi.

       Khapango chujak kokno, sabono salangsinai

       Maya halokni yakhwrai no sabo si?

       Swngsar si khwnajak ani.

       Bebakse chojak ani

       Angle lama ni bwsa.

       Swngsar khwnajak langma ani.

       Kebo kwrwi oro ani.

       Siyani selengo khatijak langma

       Yokona rwnglia nuklia lama

       Wansugwi naio, khatungwi naio

       Rutugwi naio, naio naisingwi

       Angle lamani bwsa.

       Okkhuima wansuk  naikhele

       Ogo mai tongkhe kwrwino siya.

       Kusum kosok chamung chaui

       Kahamni thokmano siliya.

       Mokolbai nugwi bo sanna rwnglia

       Tangna chanabo rwnglia

       Anglw lamani bwsa.

       

       Ano taknaisa tamo tak

       Aswkk naithok kotorma hawo

       Tongthai tongfano chathai tongfano

       Tongfano bebak buini.

       Ani bagwi kwrwi hawo

       Pokjagwi kereng kothoma

       Talikha hamya ni godikhade tongsi

       Angno lama ni bwsa.

       Mafa tongfuru kwrwino siya

       Mafani hamari no bujiya.

       Mare kiching songn angha ta wngthwn

       Ang hai talikha hamya

       Manjathai tongkhai manjaya thahngya

       Swinaisa horkha swywi

        Angle lama ni bwsa.

 

Chini ha ama

 Balirani Jamatia

 O chini ama,

Twipra ama

Nwngba aswk hanma.

Bwibai nono chwng

Sulwi malia,

Bahai nwng aswk soima.

Nini rangchak,

Bwlai kothoma,

Thahngbai kha joto kwchwi.

Nini hukumu

Chakha mukumu,

Sakfang chini kwrwi.

Nwng risa soma-

Naithok soktefw,

Kwchak kwkhwrang bumul.

Rignai kanmani-

Lokkukkha tini,

Kwlai nwng thahngkha kubul.

Longtrai jari,

Sakhangtang twibw-

Tongsokfw nwngle mwchang.

O ama chini,

Nangsok khadw nwng tini,

Thinang kok wansok mwlang.

Siring siring-

Nwng chakha tini,

Mwkhang kosoma-

Twmaswk nini?

Gumoti, raima

Twisa kochokma,

Abode nini-

Mokol ni muktwi riyorma?

Sikla fan

 Chwng sikla,

Bwkha basla,

Bwkha kwrak chini.

Naihoi bwskang,

Himnai chwng swkang,

Yago homchang chini.

Lama- kwlaijak,

Fan kwmajak,

Bono yaktol twinai.

Hor mwnakkma-

Paroi aitorma,

Dofano kochuk sonai.

Yago swikong,

Khao kubui fan,

Hiyali khorogo mani.

Fwla kaisa,

Kokthai thaisa,

Pohor pironai salni.

 

                                                                                                                                    Go to Top

Langma ni pohor 

Judha Debbarma

 Faidi bayarok

Faidi chalairok

Chwngtai mwnakmawo tonglia

Chwng pohoro thahngsinai

Hamya sitra taatal

Bwswkse chaya.

Chango rikhaui

Yago homochang twiwi.

Kubui lam kaham himallainai

Swkang ni fan tongma swk.

Silai patham da seng ni fan kwrwio

O ha nini ani chini jotoni no.

Sabo khajani sabo fikung ni

Chang jotono thansa.

Hamya no chwng naslennai

Kaham no chwng hamjak nai.

Saksak no hamjaknai

buino bo hamjaknai.

 

Sachlang Jora

                                Lorence Jamatia

 

Kwchang boyar sisaui faikha.

Bolong ni toksa tokmili rokbw

Khapang swrangwi bothobo kifilkha.

Utur gala o nokha somsakha

 

Bufang wafang bwlai kobonrwi

Khatung khajakhe mwsai tongkha.

Gondora fango kufur khumbarjak

Kerang bufango kun`kila bajak.

 

Nokhala mwchangrwi barkha khumtoya

Aswk naithokma naiwi naibaiya.

Gorom gwnang toksa rangiya

Wathwi bwlwngo rwchabma thakya.

 

Bokhorok kotor bolong tokpupu

Thakmani karwi kham tantwo.

Raisok buchuk o chikon tokpepe

Khitong khengsarwi mwsai tongte o

Bangkhung bodol fatar nongkhorwi

Khatung khaja kai yakbai yak ronwi

Nok gana ni churuisa masa

tongthok jakteui musui rwchabkha.

Dongor kotor ni yongla gobengrok

Kok swnglaio noktola harung

Nokha gurungwi watwi kwlaikha

Belaino naithok naidiba dada.

 

Suwari

                                         Lorence Jamatia

 

Suwari ang Lama hamjakkha.

Lama kebegn o Swijak kothoma.

Yapri rojong Bachajak thong thong.

Bata ani  Saijak tamo tong.

Wana gwdaljak Ani yapiri.

Sabono hamjak Sabono khari.

Daga kopro o  Khutung chapri.

Suchini lama Daga ni ari.

Bwkha ani  Ongjakha ori.

Ani hamjakma Bwini hamari.

Selengjak langma Ani hamjakma

Suwari ani  Swijak kothoma.

 

                                                                                       Go to Top

Sochindro Ruwaja Parani Ringma

Tapas Debbarma

 Khorang soklia ani, baithang kha

Fansoklia belwi thangkha

Khwnayakhude norok tabuk fano

Bisi basaini kwbang sorai faimani

Ani khajani risa tokha sotrojakmani

Changni rignai chamwthwibar khengjakmani.

Kwrwikha ani bwsak kabam dupasafano

Twma kokthai bai sanai

Bahai khe sanai

Khukperya, perwi ba twma khainai

Bugrani mokol khunjuse muthubjak

Basok tunokma tongmanlia

Kha kiyorna twi hamplai lia

Sabono sauiba hamnai

Sobhyo samaj chhi-

Angba tabuk thungjaknai manwise

Buino tongthokrinai

Kokkwrwng rokni kokthai rwbam supungnai

Thwng kwrwng rokni nukung charinai

Ang silia twi bwswk o jora malnai

Biyang thahngbai kha takhuk bukhuk rok

Ani sandai rok

Norok ni thwi kwthangno tongbai khuna bla?

 

Khumulwng Siring Siring

Prasenjt Debbarma

 Dolsa topsi birsakhe

Tei dolsa topsi birkhwlai faio khumulwng.

Rojong wngwi tei bwswk tongsinai?

Yasini ni mari sago kupulung

Mokolni mwktwino khati khatiwi

Dumburni twi ban thejak hai thom thom

Nini kha duma sabo nuksinai!

Hamjagwi kebo faiya nini khurio

Bumung simi khwnathok khumulwng

Kuchuk kherembar bahai ransajak hai

Bolong bisingni teibo bisingo kwmai

Nukthokya manthokya hathaio

Mwkhang thaisa no hwiwi

Boro thahngsinai?

 

Yakasa Kokthai Ni Bagwi

Naruttam Debbarma

 Sakfang thumo yakchakya kokthai

Khafang nakhwraio kwlwk-kufungwi

Sano swmai.

Fan sokya sak mundai rutugo

Khaching khoro tongthani luajima,

satuk hotuk yakasa maichu

Khachuksani langawo twiwi

Raimani ringhorma ragini kosol

Khorang swnamwi

Khapang halok bono kwswrang

Sokhwrya yakhwrai boui.

 

Ang tei kha

 Naruttam Debbarma

Koklobni kokbwtango

Kokthai wngwi tongna muchungo

Wngthun bo kwchar baiching.

 

Bubar barwi mwchangna muchungo

Mandogo bufang ni buchugo

Wngthun bo bomotok gwnang.

 

Ani mangni achaifangni kiching

Nukna muchungo bono

Ani sa kuchugo

Naikhwlaiya, nangthun naisana.

 

Nokha yafangni ayang naro

Kainai chethuangno

Toongthung biyal yang naro

Chethuang fangni

Wngthung bo kerong kothomani.

 

                                                                                                        Go to Top

Sisabaidi

Sharmila Debbarma

 Sisa baisidi

Chini dofarok

Takhuk bai takhuk

Thansa wngsidi

Chini hale kwmai thanai kha.

 Wakha watwi kwchak

Wngkha swngsar mwchak

Toksa toktwini khorangbai

Swngsarle kha khamjak

Hamjakma chatirok

Hawo mwswngsidi

Dofa bai dofa sinilai sidi.

 Twibang raksajak

Wngkha chini Tipra

Funuknai kaham

Achaina nangnai

Sakchamung wansokmarok

Yakarna nagnai

Haikhese chwng

Pohorno mannai.

Jora le chwngno

Naisingwi tongya

Sisabaisidi chini dofa rok

Chini manthaino wansokha sini

Chini kanmungno kanna sisidi

Amani kokno sana swrwngdi

swmai tangsidi nirok tini

obono chini paithak manthai

sisa baisidi

chini chini dofarok

 

Bujiya Nwng

Sharmila Debbarma

 Bwkhao ani, hamjakma kwpwlwng

Khugo ani, kokthai kupulung

Ani hamjakma rokno

Puitubai gwdaljak ani imang no

Maya kupuluwng ani bwkhano

Nono bedogwi rwna muchungkha.

Fia, bwini swraimung nangjak,

Khumbar joriwi thahngwi

Puituni khumtang joriwi thahgkha.

 Buchiya nwng

Hamjakma kwpwlwng ani bwkhano

Imang kupwlwng ani mokolno

Bwkhano ani hamjakma fwrwngwi

mokolno ani imang funugwi

komorkha nwng pantwi kwmatwi.

 Bwkhano ani yoksarwi

Muktwino ani yorsarwi

Tongna nangkha ang,

Bwkhano buthwbwi,

Buchiya nwng ani o hamjakma rokno

Imang kwpwlwng ani mokolno

O ani jadu buchiya nwng.

Tipra Amani Kwtal Kothoma

 Surajit Debbarma

 Mokol tongtwtwi mokol nukya chwng,

khunju tongtwtwi khwnaya chwng.

Kobolwi tongkha swngchar,

kamawui tongkha chini ha.

Bachadi o takhuk, sichadi o bukhuk,

Ringhorwi tongo nono' ha ama'.

Tei bwswk nuktwtwi nukya wngnai?

Tei bwswk sitwtwi siya wngnai?

Tei bwswkse thulaisinai.

Twipra 'ha amani' muktwi

Tei bwswkse yorsinai?

Bachadi o takhuk, sichadi o bukhuk

Ringhorwi tongo nono 'ha  ama'.

 Jorale naisingwi tongya chwngno,

chwngbo naisingwi tong maya jorano.

Phaidi jora bai baksa,

Tangnai khao swmai kaisa;

Chwng tonglainai thansa.

Yak bai yak baksa,himnai chwng yapri kaisa.

 Phaidi chwng swinai 'ha amani' kwtal kothoma,

Manai khawobo tongthokma.

Mokolni naithokma, khunjuni khwnatokma

Swijakthung Tipra Amani Kothoma.

Achaima ha

Anars Debbarma

Ani achaima haa

Bwswk se naithok o ha,

Khumbar kiyokjak, toksa rwchabjak

Bwswkse tongthok o ha.

Twima kotor twisa gumoti;

Ranwi thahnglak mokolni muktwi,

Hathai kuchuk, Atharomura;

Himwi nayani sokyasak jora.

Phaidi takhukrok,

 phaidi bukhukrok

Sochanai chwngle chini borokno;

Lama hamyano khibiwi chwngle,

Thahngsinai chini pohorni swkang.

Achaikha oro, thwinai bo oro,

Ani achaima haa,

O Tripura haa.

 

                                                                                              Go to Top

Aichuk ni Boyar 

Gopal Debbarma 

Aichukni boyar sibchaui faikha,

Nokha tal pirwi swrangsai faikha,

Aichuk mwchangwi tokla kochigwi faikha.

Boyar kwchang sibsaui mwchangwi tongo

Toksa toktwirok aichuk

mwchangwi pungwi tongkha

Aichukni boyar mantirwi

khumle dale dal barwi togbaikha.

Kaisaya chumui kwbangma chumui

Bwkha ba ani bayano de khatang

Bayab sakchalai tongwi faimani

Wansugwi faikha,

 aichuk boyar bai baksa.

Khawo muitu mantiro,

aichuk boyar bai baksa

Aichuk boyar ni logio kobon kha bwkha.

Aichuk ni jora belai tongthokma jora,

Bolong ni khum toktwi rok barwi tongbaikha.

Aichuk ni boyar firogwi faikha

Mwkhangwi tongkha jorale belai.

 

Bigrasa

 Gopal Debbarma

Chana mai kwrwi          sakni ri kwrwi

Haino tongjao bigra bwsa hinwi.

Mokolni muktwi            sakni kolomtwi

Salbai horbai mokolni muktwi rekerwi faio.

Tongna nok kwrwi        chana mai kwrwi

Fung aifaio nokha sal kawi.

Ogo mai kwrwi      samung bo kwrwi

Watwi wai faiyo ruprup khai.

Boro samung ba           naitugwi mannai

Gwnangrokni aroba samung de mano?

Watwi ni jora    samung manglak

Nono ang tabuk twma samung rinai?

Bole gwnagba               wanama kwrwiba

Hwnwi rohorkha bigrasa hinwi.

Samung ta sanfaidi        ani orowo

Samung mayaba kha wansugwi.

Kifilwi faio        mokolni muktwi huwi.

Gwnang ni khawo tongthokma paiya.

Bigrasa rokni    mokolni muktwi huwi hubaiya.

 

Wngdi

 Kahamnuk Jamatia

 Kha kwthwi khao kwtal wansukmung rwdi

Mokjak mokolo kwtal imang rwdi

Aichukni sal wngdi.

 Mwnakma horo pohor rwdi

Lama korojakno lama funukdi

Horni tal wngdi. 

Bolong kutukmano huk swnamdi

Ha chogwi maichwlwi kaidi

Dofani da-borok wngdi.

Lama kwthakfuru kwtal lama swnamdi

Lama kebengrookno riyorwi tilangdi

Basalni twima wngdi.

Kwlaijakno songsadi

Kwlwino rakrwdi

Wahni doong wngdi.

 Khunjuni wakhum, yakni mathiya wngdi

Yathekni gugra kotokni mala wngdi

Dofani mwchang wngdi.

Khwna

 Kahamnuk Jamatia

Tongtwtwi tini mwlwgo ang

Uito ano mankhwna

Kwdwkma ulo tini tai waisa

Mung ani bo khukhwna.

 Tonogtwtwi tini kha swrangw

Kha khulogwi mwnwi khwna,

Kwdwkma ulo baya songbai

Miya faina bo thahng khwna.

Tongtwtwi tini kangmahai wngw

Khasi ani rankhwna

Kwdwkma ulo ani nokhlatwi

Twi khokna, bo thahngkhwna.

 Tini ni sarik motomma bara,

Khumsarik barkhwna,

Kwdwkma ulo, tini twi waisa

Khaju-o khum berkhwna.

 Athukrwi kwplwng, nokha chwngsajak

Hor sikla chakhwna,

Kwdwkma ulo tini twi waisa

Talno bo naisa khwna.

 Rokogwi tini mwktwrwimanya

Horsi aina wngkha,

Kwdwkma ulo, thutwtwi tini,

Ano bo imang nukkhwna.

 

                                                                                                              Go to Top

Bwmani Wansukma 

Manmohini Jamatia

 Bwma masa wansukjamani

Sajla sajwk rokni bagwi khul lupmani.

Hoja hordibor thuya karwi

Swnamkha bini imang naithok khaiwi.

Wansugo bole khul lupbai nai kha.

Tabukle ani wansukma nangnai kha.

Dalbidal khawo wansugwi,

Khuluptero mwnwiterwi

Tongthokma khawo chubai manjakya,

Saisung kok saui kul paijakya.

Ani bwsarok thorsa loksakhe

Mwchang ganw borok o rino kankkhe,

Yathek yak baksa khe bohrok himkhe

Tonganw bohrokle warik warik khe.

Yak baksa wngkhe fan baksa wngnai,

Kebono borog kiriya wngnai.

Bumale rikha richum swnamwi

Khatung khaja khai wansugwi.

Kaham khe tisana rwngya bwsarok

Faiwi warbaikha biyang ni sinjorok,

Fonderik fonderik wngwi thahng kha,

Singjo ni tongthaise wngwi paikha.

Buma nugwile tongwi manjaklia,

Manjuk gwi soui bo gothokri manlia.

Manjuk hinwile bwswk manjuk sinai,

Bahai abono manjuk baisinai,

Bwsarok sinjono rwkthar rihorkha,

Tobo bohrogni ri-no kaham khe

Manjuk manlia wngkha.

Siniya khorang

 Manmohini Jamatia

Khwnawi ang nini khorang no,

Ma wansuk kha angle belaikhai no.

Sabole wngkha nwngle?

Mwkhang siniya ang nonole,

Khwnaui nini khorangnole

Ma tongo angle sinima haile.

Siniya tobo wansuk naimani,

Nwngba saboba wngkha jani.

Siniya nukya khorang nwng khaiwi,

Tangwi himrikha ano wansukma lamtwi

Swrapsa ni bagwi maya nwng riwui

Tangwi nwng kwlangkha ano kabriwi.

Nini mayano angle pogwi mangwlak,

Nono karwi ang wansuk manglak,

Hoja hordibor ano sochawi

Wansukma kokno ano sariui,

Tongkha nwgbo haparo hwijagwi,

Sanja saljora ano naitukrwi

Hamjakma khawo sibsariwi

Tongkha nwng bahai kwra thung gwi.

 

AMA 

Ranjana Jamatia

Ama nini khorang kwtwi bai

Afu hinwi ringma khwnamabai;

Ani khapang swrang kha.

Kwbangma ni kwcharwo! bahai,

Saichunghai matong mani;

Nono gandaro manmabai

Tongthothok hai matongkha.

Oh! Maya kwrwi hafarwo tongthogya,

Mokol sirosogwi kana muchung mani

Nini khurio bokhorog beramabai-

Mayabai gwdalljak sakno matongkha.

Nini khorang kwtwi bai

Afu hwnwi ringma khwnambai

Ani khapang swrang kha.

 

KABMA MUKTWI KWLAIMA, SANMA

 Trijeshwar Debbarma

 Okora chakra rokni khugo khwnama

Je kabnai bono mano chama nwngma.

Lukurok hino mo kok nanagnai no.

Dud chario buma bwsa kab khai no.

 Cherai hamya le kah kha nang kabya.

Kab bo naidi muktwi kwlaliya.

Salobo kabnai horobo kabnai.

Thukai simi se nilar wng tongnai.

 Kaham cherai le sapung bo kabya.

Cherai no buma jai khwlai taya.

Soiya hin khai belali ok khuima

Afuru kabsinai bole o ma o ma.

 Ok khuima soilia kabma thakya.

Muktwi kwlalima mokol ni choya.

Bwma dudh charibo kabmani pogya.

Bini kha khamma swlwgmarok pogya.

 Kabjao bole yokya hwnkhaise.

Hamjakma bango bwma afwruse.

Hamya cherai le sanmabo thakya.

Kokchali bwsano charibo kulmanya.

 Angbo mo hani ma khoroksani bwsa.

Kabma ani belai wanama singsa.

 

                                                                                                                                        Go to Top

Fiyok Jakkma

  Shaymal Debbarma

Toksa toktwirok chapjagwi

Punglaio khayak salawi,

Borok ni khorang swlwkjakno khwnawi

Kab yamoraoko yachagwi.

Sapung sal kolok hopung hor kolok,

Dabusa thaio.

Tongo bohrokle sak mecherjagwi

Bwkwrang kholopchaui,

Buini chamung barano chaui.

Yakung kicha barwi,

Tongjao mokol mokjak khaiwi

Anyang uyang kisa naharterwi

Kiri sorosoro bwsakno twywi

Chamung damano twisa hunwi

Bangrang bachaui yoknani naio

Fia fan kulokya bai

kasujagwi tongo

sapung sal kolok hopung hor kolok

bwswk le tongsinai sugwi

Bahano satok jagwi

Thwibai kha baksa ba hao kwlaliwi,

Omor kasukya wi.

 Aboni ulo borogni dosano nugwi

Fiyogwi rikha bera sichigwi

Bwkwrang fehelei

Tongthoko laikha kha baksa kahiwi.

Thai kotor wngkha borokni bagwi

Sakni muchung twi tonglai kha

Bothop thumwi.

Tonglia buini muchungtawi

Khorok atisawi.

Saisung sak baithang bachawi himsakha

jotono kwchang tongwi.

 

Pohor Fasing

 Shaymal Debbarma

Nini wansukma pohor fasing

Rwngnok kotor rwng nogo

Porina muchung jago nwng

Naslema khamaiima kwrwi

Nini thani.

Tamo khe chajakya nwng

Chuwak maikham no tini

Nwng tongo pohor fasiing.

Sakno hamjaktwi nwng

Hamjago buinobo,

Hamjakmung mano nwng

Joto bai no nini wansukma

Pohor fasing.

Aichugo bachaui,

Tango nwng samung

Baithang thinang ni bagwi

Jorano naharwi kha wansugwi

Himo nwng bwsakng .

Ani Achaima ha

                                           Aghure Debbarma

Ani achaima ha

Tongbo tongbo tongbaiya.

Chabo chabo chabaiya.

Naibo naibo naibaiya.

Hapung harep twima twisa

Kuchuk hache hathai hapung

Bolong walong naithokma bini.

Chirik mirik toksa ni khorang

Hodom dodom nobar ni khorang

Kuchuk kolok twisa ni khorang

Awar kotorma naikol maya

Khetoni mai bomwi tongbai kha

Khulumo chini hano.

Ani achaima ha

Bwswlse tongthok ha

Abo se chini Tripura ha.

 

                                                                                                                                                  Go to Top

 


 

 


Khorang 2001

 

 

 

 


Khorang 2005
 

 

 

 

 

 


Khorang 2006
 

 

 

 

 

 


 

Khorang2009